أفكــــــــــــــار جامدة جدا

مايكل بريتشارد يحوّل الماء الملوث الى ماء قابل للشرب

يفتقر الكثيرون حول العالم لمياة شرب نظيفة. المهندس مايكل بريتشارد فعل شئ حول هذا-- اخترع فلتر محمول منقذ للحياة ، الذي يمكن أن يحول أكثر المياة المقززة إلى مياة شرب في ثواني. عرض تمهيدي مذهل من

TEDGlobal 2009

ليه بقى واحنا ناس جامدين جدا في كل حاجة وميه ميه زي الحكومة الذكية مابتقول مانستعملش حاجات زي دي في القرى الفقيرة أو المناطق اللي مابتوصلهاش ميه نقية؟؟ ليه الجمعيات الخيرية ماتستغلش فكرة زي دي متنفذه فعلا وتشتري منها كميات وتديها للناس دي كوديعة لغاية ما ربنا ييسرلهم وتدخلهم الميه - وبصراحة الراجل في الأخر قال كل الكلام اللي ممكن يتقال

لا للمحاكمات العسكرية للمدنيين

لا تكتفي الدولة بتشريد وإذلال وقتل العمال بدم بارد نتيجة سياساتها المعادية لهم، بل تسعى أيضا لإسكات أصواتهم باستخدام أكثر الأساليب قهرا بتقديمهم للمحاكمة العسكرية التي لا يتوافر بها أي ضمانات أو حقوق دفاع.

يحاكم الآن ثمانية عمال من مصنع 99 الحربي (شركة حلوان للصناعات الهندسية) أمام المحكمة العسكرية بتهم إفشاء أسرار عسكرية والامتناع عن العمل والاعتداء بالضرب على اللواء محمد أمين رئيس مجلس إدارة الشركة، كان العمال الثمانية قد تم القبض عليهم مع 17 آخرين من زملائهم عقب اعتصام عمال المصنع يوم 3 أغسطس الجارى احتجاجا على انفجار أنبوبة نيتروجين ( غلاية ) داخل المصنع مما أدى إلى وفاة العامل أحمد عبد الهادي(37 عاما) وإصابة ستة عمال آخرين بجروح.

وعلى أثر تلك الاحتجاجات سعت أجهزةالدولة إلى ترهيب العمال وتأديبهم لتجرأهم على الاحتجاج فاتخذت ضد 25 عامل إجراءات تحقيق تلاها إحالة 8 من عمال المصنع إلى النيابة العسكرية تمهيدا لتقديمهم لمحاكمة عسكرية رغم أنهم عمال مدنين ورغم أن الأمر يتعلق بنزاع عمل تحكمه القوانين العادية.

وقامت النيابة العسكرية يوم السبت الموافق 14 أغسطس بحبسهم أربعة أيام على ذمة التحقيقات ثم تجديد حبسهم مرة أخرى يوم الثلاثاء الماضى، ثم تحويلهم للمحكمةالعسكرية التى بدأت أولى جلساتها الأحد 22 أغسطس ليتم تأجيل المحاكمة إلى الأربعاءالمقبل، كما رفضت النيابة العسكرية إعطاء المحامين صورةملف القضية للإطلاع عليه، وتحددت جلسة مفاجئه سريعة للمحاكمة.

وبالرغم من ادعاء وزيرة القوى العاملة عائشة عبد الهادي دائما في جميع المحافل بأنها تقف بجانب حقوق العمال، إلاأنها لم تحرك ساكنا إذاء ما يحدث للعمال، هذا بالإضافة للصمت المعهود من اتحاد عمال مصر و تقاعصه عن الدفاع عن حقوق العمال والتصدي لما يحدث لهم من انتهاكات.

ونعلن نحن المتضامنين مع العمال رفضنا لتقديم عمال مدنيين لمحاكمة عسكرية، وتطالب بإحالة القضية للقضاء العادي، وتطالب أيضا بمحاكمة المسؤلين عن موت العامل ومحاكمة إدارة المصنع التي تسببت في أكثر من انفجار وإصابات ووفيات بين العمال بسبب الإهمال، ونحذر أن تكون المحاكمة صورية وحكمها جاهز سلفا، ونعلن بدأ حملة تشهير واسعة محليا ودوليا ضد المسؤلين عن تلك المذبحة

يرجى توقيع البيان هنا

عن إحالة العمال للمحاكم العسكرية موت وخراب ديار

الشعب...والشرطة؟؟

الحالة دلوقتي ان في "جهتين" محتنقتين تماما من بعض

الجهة الاولى هي الشعب

الجهة التانية -طبعا- الشرطة

الشعب -اللي أنا واحدة منه- بيقول :

الشرطة لا تحترمني أو تعاملني بآدمية بل على العكس بتتكبر علينا من اقل مخبر ولا أمين فيها لغاية وزيرها اللي مابيحضرش أي استجواب للوزارة في مجلس "الشعب"- وتقوم بتعذيبي وأحيانا سحلي وفي بعض الأوقات قتلي، ده غير تلفيق التهم للناس اللي ماشية في الشارع-اللي مالهمش ضهر- عشان القضايا تتقفل والناس تترقى ودفتر المحاضر يخلص ويملى عين التخين.

ظباط الشرطة بيقولوا:

انتوا مش بتقدروا احنا بنعمل إيه عشان تمشوا وتعيشوا في أمان إحنا مش بناخد أجازات بالسنين بنتعامل مع أحط أنواع البشر كل يوم وكل ساعة ، بنعرض حياتنا للخطر بشكل يومي ده غير الحرمان من الحياة العائلية الطبيعة مع أهلنا وأولادنا وأي واحد بيتقتل (يستشهد) مننا أثناء قيامه بمهام عمله بيروح ولا حد يسأل عنه وعلى عن أهله ولا أصلا بتفتكروا اسمه! ده انتوا بقيتوا بتحاولوا تستفزونا لما بتشوفونا!!!

مش ملاحظين إن في حاجة غلط؟

يعني إيه شرطة وشعب ؟؟

وازاي ده يتحط في جهة وده في جهة؟؟

ليه مانحطش الشرفاء من الاتنين في جهة والمعتدين عالقانون من الاتنين في جهة ؟؟

يعني الظابط اللي بيعذب المتهمين - حتى لو كانوا مجرمين فعلا - عشان يعترفوا يبقى زيه زي تاجر المخدرات،

وأمين الشرطة اللي بيبلطج عالناس يبقى زيه زي الحرامي والقاتل،

لأنهم ببساطة في الحالتين (شعب أو شرطة) خارجين عن القانون.

ليه الناس الشريفة من الشرطة ماتقفش معانا ضد اي عنصر فاسد منهم بيعذب الناس ويهين كرامتنا في الأقسام أو في الشارع؟

ليه بتحموه وتدافعوا عنه وتداروا عليه؟؟!!

ليه ماتحاربوش معانا – مع الشعب- ونبقى كلنا في جبهة واحدة ضد الفاسدين والجلادين وتجار المخدرات والبلطجية والحرامية؟؟

بدل ما كل حد فينا واقف يدافع عن نفسه ويهاجم الطرف التاني !!

أخر حاجة: احنا مش شعبين احنا شعب واحد !!!

تشويش المرة دي

بمناسبة الحديث عن التشويه ده جزء من مقالة أستاذ محمد علي خير بالدستور رمضان والتوقيت الصيفي

المقالة بتبين لنا ازاي حكومتنا عندها شوية عباقرة مختصين في حتة التشوية دي بالذات لا والتشويش فوق البيعة- دول المفروض يفتحوا أكاديمية ولا يبخلوا على البشر بعبقريتهم

"هل يمكن أن يدلنا الدكتور أحمد نظيف علي دولة واحدة في العالم قامت حكومتها بتغيير مواعيد التوقيت بها خمس مرات في العام، وإذا كانت هذه الدولة موجودة فهل استمرت حكومتها في السلطة بينما تقوم بتغيير مواعيد التوقيت بهذا الشكل العبثي مثلما تفعل حكومتنا."

أكيد الحكومة الذكية اللي عندنا أذكى من أذكاها حكومة في العالم ومش محتاجة تقلد حد - حكومتنا يا مدرسة لعب وفن و... هندسة!

"بدأت حكومتنا العام الميلادي الجديد بالتوقيت الشتوي، واستمر العمل به حتي مايو الماضي موعد العمل بالتوقيت الصيفي، والذي سيتم إيقافه قبل حلول شهر رمضان بيومين اثنين فقط، ثم يعود العمل للمرة الثالثة بالتوقيت الشتوي، وبعد انتهاء عيد الفطر المبارك سنعود ثانياً- عفواً رابعاً- للعمل بالتوقيت الصيفي ولمدة عشرين يوماً فقط لاغير، وبعد مرور تلك الأيام العشرين سوف تعيد حكومتنا وللمرة الخامسة العمل بالتوقيت الشتوي حتي نهاية العام.. هل فهمت شيئا؟"

لا والله ! مانا لو افهم هاقول على طول !!

"ما فعلته حكومة نظيف من عبث بالتوقيت، يجعلنا الدولة الوحيدة-والأعجوبة- في العالم التي غيرت توقيتها الزمني خمس مرات في العام، بمتوسط مرة كل عشرة أسابيع، بالله عليكم هل يوجد كائن حي في الكرة الأرضية يتحمل العبث بالتوقيت الزمني الذي يتعامل به بهذا الشكل وخمس مرات دفعة واحدة."

لا تعليق !

"ما نعرفه-وتعرفه حكومتنا أيضاً- أن كثرة تغيير مواعيد التوقيت الزمني لأي دولة يحدث ارتباكا في تعاملاتها مع مختلف دول العالم ومؤسساته المالية وكذلك رحلات الطيران والسفر، واختلالات تنشأ بسبب تغيير بدء اليوم ونهايته، فكيف تبرر حكومتنا للعالم تغيير التوقيت خمس مرات في العام؟"

ده مش تشويه سمعه -كفى الله الشر- لا دي مسخرة

الله يكون في عوننا ويرحمنا - ده لسه رمضان التسع سنين اللي جايين في الصيف

غالبا هانطلب مالحكومة الذكية انها تبعت لنا ابديت كل يوم بالساعة على ايه النهاردة!!!

تشويه سمعة مصر

اللبانة اللي في بقهم كل ماحد يحاول يتكلم "بس اكتم خالص انت بتشوه سمعة بلدنا"

هو اللي يقول انا باتقتل في الاقسام والشوارع كل يوم

واللي يقول انا باتذل واتبهدل كل مادخل قسم او اجدد رخصة في مرور او ماشابه

واللي يتشكي مالنهب والسرقة والرشاوي والمليارات اللي بتتسرق وطيران على بره

يبقى هو اللي بيشوه سمعة بلده؟

يتسرق ويتهان ويشوف الذل الوان ويتقتل والمفروض يخرس خالص

لحسن في سيف متسلط على رقبة اللي يتكلم واسمه تشويه سمعة المحروسة

ما اللي بره كده كده عارفين كل حاجة واكتر مني ومنكم

(دي تقارير صحة الريس بتطلع من اسرائيل !!!)

اللي لازم تفهموه ان اللي بيشوه سمعة مصر بره

التعذيب

والقتل

وانتهاك الحريات

وضرب المتظاهرين وسجنهم

وقانون الطوارئ

ورفض التوقيع على معاهدة منع التعذيب

والفساد

والتوريث

وتزوير الانتخابات

والرشاوي من مرسيدس وغيرها ويطلع نظيف يبوس ايديهم عشان مايعلنوش اسم المرتشي!!!

هو ده اللي يشوه وينيل سمعة مصر

خلاص فقدتوا التمييز؟؟

رضيتوا بالقرف ده وساكتين ؟؟

ياريت السيف يتشال من على رقابينا

ويتسلط عاللي بيعمل اي حاجة بتشوه فعلا سمعة مصر

احنا الحمد لله ضد النظام اللي بيشوه سمعة بلدنا في الخارج

ونفسي اعرف لحساب مين بيعمل كده؟؟؟